عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
پهرتوکا پیرۆز
- ساخ كرنا خزمەتكارێ سەرلەشكەری
- 1
- پشتی هەمی ئاخفتنێن خۆ گەهاندینە گوهێن خەلكی، چوو باژێرێ كەفەرناحوم.
- 2
- سەرلەشكەری كۆلەیەكێ نەساخ هەبوو، كەفتبوو دەراڤێ مرنێ و گەلەك یێ خۆشتڤی بوو ل نك وی
- 3
- دەمێ وی ناڤ و دەنگێن عیسای گوهـ لێ بووی، ریهسپیێن جوهیان هنارتنە نك وی و هیڤی ژێ كرن، كو بهێت كۆلەیێ وی قورتال كەت،
- 4
- دەمێ گەهشتینە نك عیسای، گەلەك هیڤی ژێ كرن و گۆتنێ: «ئەڤ سەرلەشكەرە گەلەكێ هەژییە تۆ داخوازا وی ب جهـ بینی.
- 5
- ئەو گەلەك حەژ مللەتێ مە دكەت و كنیشتا مە وی یا ئاڤاكری.»
- 6
- عیسا دگەل وان چوو، لێ دەمێ گەهشتییە نێزیكی مالا سەرلەشكەری، وی هندەك هەڤالێن خۆ هنارتن داكو بێژنە عیسای: «هێژا، خۆ زەحمەت نەدە، چنكو ئەز نە هەژی وێ چەندێمە تۆ بهێیە مالا من.
- 7
- لەوما من خۆ هەژی نەدیت بهێمە دیدارا تە. هەما ب تنێ تۆ پەیڤەكێ بێژە دێ كۆلەیێ من ساخ بیت.
- 8
- ئەز ب خۆ ژی دبن هێزەكا ژ خۆ مەزنتر ڤەمە، و هندەك سەرباز ل بن دەستێ منن. دەمێ دبێژمە ئێكێ ژ وان هەرە، دچیت. و دبێژمە یێ دی وەرە، دهێت. دبێژمە كۆلەیێ خۆ ڤێ بكە، دكەت.“»
- 9
- دەمێ عیسای ئەڤ چەندە گوهـ لێ بووی، ژ ئاخفتنێن وی گوهشی، و پاشی ل خۆ زڤری و بەرێ خۆ دا وێ كوما ل دویڤ دهێن و گۆت: «ئەز دبێژمە هەوە، خۆ ل ئیسرائیلێ ژی باوەریەكا هوسا مەزن من نەدیتییە»
- 10
- و دەمێ هنارتیێن سەرلەشكەری ڤەگەڕیاینە مال، دیتن كۆلە یێ ساخ بووی.
- عیسا كوڕێ بیژنەكێ زیندی دكەت
- 11
- ل رۆژا دی ئەو و شاگردێن خۆ دگەل خەلكەكێ زۆر چوونە باژێرەكێ دبێژنێ «نایین».
- 12
- دەمێ نێزیكی دەرگەهێ باژێری بووین، مریەكێ هەلگرتی، ئێكانەیێ دایكا خۆ یا بیژن بوو، ژ باژێری دەردئێخست. و جەماوەرەكێ مەزن ژ باژێری دگەل دایكا وی دا بوو.
- 13
- دەمێ خودانی دایكا مری دیتی، گەلەك دلێ وی پێ سۆت و گۆتێ: «نەكە گری».
- 14
- پاشی چوو پێش و دەست هاڤێتە داربەستێ، ئەو مرۆڤێن مری ل سەر ملێن وان، راوەستیان. وی گۆت: «لاوو، ئەز دبێژمە تە: رابەڤە.»
- 15
- ئینا مری روینشت و دەست ب ئاخفتنێ كر و ئەو گەنج دا دەستێ دایكا وی.
- 16
- ترسێ دلێ وی خەلكی هەمیێ گرت، و خودێ مەزن كر و گۆتن: «پێغەمبەرەكێ گەلەكێ مەزنێ ژ ناڤ مە رابووی و خودێ سەرەدانا گەلێ خۆ كر.»
- 17
- ئەڤ دەنگوباسە ل هەمی دەڤەرا یەهودیایێ و دەوروبەرێن وێ بەلاڤ بوون.
- عیسا و یوحەننایێ تافیركەر
- 18
- شاگردێن یوحەننای ئەڤ هەمی دەنگوباس و كریارە گەهاندنە وی. یوحەننای گازی كرە دوو شاگردێن خۆ
- 19
- و هنارتنە نك خودانی،كو بێژنێ، توی ئەوێ دێ هێت یان خۆ ل هیڤیا ئێكێ دی بگرین؟
- 20
- دەمێ هەردوو زەلام هاتینە نك خودانی گۆتنێ: یوحەننایێ تافیركەر ئەمێن هنارتینە نك تە و دبێژیت: توی ئەوێ دێ هێت یان خۆ ل هیڤیا ئێكێ دی بگرین؟
- 21
- ل وی دەمی گەلەك ژ نەساخی و دەرد و گیانێن پیس ساخ كرن، و بیناهی دا گەلەك مرۆڤێن كۆرە.
- 22
- ئینا عیسای بەرسڤا وان دا و گۆت: هەرن ئەوا هەوە دیتی و گوهـ لێ بووی بگەهیننە یوحەننای: كۆرە یێ دبینن، و لەنگ یێن ب رێڤە دچن، و لەش گۆڕی یێن پاقژ دبن، و كەڕ یێن دبهیسن، مری یێن رادبن و هەژار یێن دهێنە مزگینی كرن.
- 23
- و خوزیكێن وی یێ گومانێ ژ من نەبەت.
- 24
- چەوا شاگردێن یوحەننای چوون، عیسا بۆ وی خەلكێ كومبووی دەربارەی یوحەننای ئاخفت و گۆت: «هوین چوونە چۆلی دا چ ببینن؟ ئەرێ لەڤەنەكێ ب بای دلەرزیت؟
- 25
- ئەڤجا هوین چوون چ ببینن؟ ئەرێ مرۆڤەك جلێن نەرم ل بەر دانە؟ ئەڤە خودانێن جلێن بها گران و حەمەر د كوچكێن پاشايان دا.
- 26
- ئەڤجا هوین چوون چ ببینن؟ پێغەمبەرەكی؟ بەلێ، ئەز دبێژمە هەوە ژ پێغەمبەری ژی مەزنتر.
- 27
- ئەڤ چەندە یە ل سەر هاتییە نڤیسین: ”ئەز دێ هنارتیێ خۆ ل پێشیا تە هنێرم،ئەوێ رێكێ بۆ تە ئامادە دكەت.“
- 28
- ئەڤجا ئەز دبێژمە هەوە ل ناڤ یێن كو ژ ژنان بووین، كەس ژ یوحەننای مەزنتر نینە. لێ بچویكترین كەس ل پاشاتیا خودێ ژ وی مەزنترە.»
- 29
- دەمێ خەلكی ئەڤ چەندە گوهـ لێ بووی، هەمیان و تا باجگران ژی راستیا خودێ دووپاتكر، چنكو ل سەر دەستێ یوحەننای هاتبوونە تافیركرن.
- 30
- لێ فەریسی و زانایێن دەستوری حەزا خودێ رەتكر، چنكو ل سەر دەستێ یوحەننای نەهاتبوونە تافیركرن.
- 31
- «ئەرێ ئەز مرۆڤێن ڤی نڤشی ب چ هەڤبەر بكەم؟ ئەرێ وەكو چنە؟
- 32
- ئەو وەكو زارۆكێن ل بازاری دروینشتینە، گازی ئێك و دوو دكەن و دبێژن: ”مە زورنا بۆ هەوە لێ دا، هەوە سەما ل بەر نەكر و مە شینی بۆ هەوە دانا، هەوە نەكرە گری.“
- 33
- یوحەننایێ تافیركەر هات، نە نانی دخوت، نە ژی مەیێ ڤەدخوت و هەوە گۆت: ”ئەجنەكێ تێدا“،
- 34
- و پاشی كوڕێ مرۆڤ هات، دخوت و ڤەدخوت و هەوە گۆت ”ئەڤە مرۆڤەكێ خورە و سەرخۆشە و هەڤالێ باجگران و گونەهكارانە“،
- 35
- لێ دانایی ژ لایێ هەمی كوڕێن وێ ڤە یا هاتییە سەلماندن.»
- عیسا ل ژنەكا گونەهكار دبوریت
- 36
- لێ ئێك ژ فەریسیان داخواز ژێ كر خوارنێ ل نك وی بخوت و چوو مالا یێ فەریسی و پال ڤەدا.
- 37
- ل وی باژێری ژنەكا گونەهكار هەبوو. چەوا وێ ژنێ زانی عیسا ل مالا یێ فەریسی مێڤانە، شویشەكا بێهنا خۆش هەلگرت و چوو مالا وی
- 38
- و ل پشت عیسای و ل نك هەردوو پێن وی و ب گریڤە راوەستیا و هەردوو پێن وی ب روندكان تەركرن، و ب پرچا سەرێ خۆ هشك كرن، و هەردوو پێن وی ب گەرمی ماچی كرن و بێهنا خۆش لێ كر.
- 39
- دەمێ فەریسیێ خودانێ مالێ ئەڤ تشتە دیتی، دگەل خۆ ئاخفت و گۆت: «ئەگەر ئەڤە پێغەمبەر بایە، دا زانیت كا كییە دەست دكەتێ، و كا چ جورە ژنكە، چنكو ئەو یا گونەهكارە!»
- 40
- ئینا عیسای بەرسڤا وی دا و گۆت: «شەمعون، من تشتەكێ هەی دێ بوو تە بێژم» شەمعونی بەرسڤ دا و گۆت: «بێژە مامۆستا»
- 41
- و گۆت: «ئێك ژ وان كەسێن قەر دگەل خەلكی دكرن. قەر ل سەر دوو مرۆڤان هەبوو، ئێك ژ وان ب پێنج سەد دیناران یێ قەردار بوو و یێ دی ب پێنجی دیناران.
- 42
- لێ چنكو هەردووكان پارە نەبوون وان قەران ژ سەر خۆ راكەن، ئینا خودانێ قەری هەردوو ئازا كرن. تۆ بێژی كی ژ وان هەردووكان دێ پتر حەژ وی كەت؟»
- 43
- ئینا شەمعونی بەرسڤ دا: «ئەز دبێژم ئەوێ خودانێ قەرێ پتر.» عیسای گۆتێ: «تە دادیەكا راست ڤەبری.»
- 44
- پاشی بەرێ خۆ دا ژنكێ و گۆتە شەمعونی: تۆ ڤێ ژنكێ دبینی؟ ئەز هاتمە مالا تە و تە ئاڤەك نەدا من ئەز پێن خۆ پێ بشوم، لێ ئەوێ پێن من ب روندكان شویشتن و ب پرچا خۆ ڤەمالی.
- 45
- تە ماچەكا ب تنێ ژی ل من نەدا، لێ ئەوە ئەز هاتیمە د ژۆرڤە ئەو ژ ماچیكرنا پێن من ڤەنەبووییە.
- 46
- تە روین د سەرێ من نەدا، لێ ئەوێ بێهنا خۆش ل پێن من كر.
- 47
- ژ بەر ڤێ چەندێ ئەز دبێژمە تە گونەهێن وێ یێن گەلەك هاتنە بورین، چنكو وێ گەلەك یا حەژێكری، لێ ئەوێ پیچەك لێ دهێتە بورین، پیچەك حەژێكرنێ دكەت.
- 48
- پاشی گۆتە وێ: «ل گونەهێن تە هاتنە بورین.»
- 49
- ئینا ئەوێن روینشتی د ناڤبەرا خۆ دا گۆتن: «ئەڤە كییە هەتا ل گونەهان ژی ببوریت؟»
- 50
- و گۆتە ژنكێ «باوەریا تە تۆ قورتال كری، ب ئاشتی هەرە».
